ქუთაისის ცენტრი ემსახურება იმერეთის რეგიონს.

იმერეთის რეგიონი:

• რეგიონში შემავალი მუნიციპალიტეტები: ქუთაისი, ბაღდათი, ვანი, ზესტაფონი, თერჯოლა, სამტრედია, საჩხერე, ტყიბული, წყალტუბო, ჭიათურა, ხარაგაული, ხონი.
• მოსახლეობის რიცხოვნობა (ათასი კაცი): 507000
• ფართი (კვ.კმ.) : 6414.7

ცენტრის სერვისები:

• დიდი საკონფერენციო ოთახი 55 ადამიანისთვის;
• მცირე საკონფერენციო ოთახი 12 ადამიანისთვის;
• მცირე სამუშაო ოთახი ინდივიდუალური შეხვედრებისთვის;
• კვებით მომსახურება;
• ფოტო/ვიდეო გადაღება.

ქუთაისის  ოფისი   გაიხსნა 2012 წლის 7 თებერვალს. გახსნის დღიდან ცენტრში გაიმართა 3900-მდე  შეხვედრა, სადაც დაახლოებით 137 000-მდე ადამიანმა მიიღო მონაწილეობა, მათ შორის  არასამთავრობო ორგანიზაციების, სამთავრობო დაწესებულებების, მედია და ბიზნეს ორგანიზაციების, პოლიტიკური პარტიების წარმომადგენლებმა და რიგითმა მოქალაქეებმა.

ქუთაისის ცენტრის ინიციატივით გაიმართა 250 საჯარო დისკუსია, როგორც ადგილობრივ, ისე ეროვნული მნიშვნელობის საკითხებზე.  აღნიშნული შეხვედრები მოიცავდა გენდერული პოლიტიკის, დევნილთა, სოციალურ, ჯანდაცვის, ინფრასტრუქტურის  და ახალგაზრდული პოლიტიკის საკითხებს.  ცენტრის ორგანიზებით გამართულ შეხვედრებზე მოქალაქეებს საშუალება ეძლევათ შეხვდნენ და თავიანთი მოსაზრებები გაუზიარონ ადგილობრივი და ცენტრალური ხელისუფლების წარმომადგენლებს, პარლამენტის წევრებს და ყველა იმ უწყებას, რომელიც უშუალოდ არის ჩართული ცენტრალური თუ ადგილობრივი მნიშვნელობის საკითხების მოგვარებაში. ცენტრში გამართული შეხვედრები და დისკუსიები ეხება როგორც ადგილობრივი მნიშვნელობის საკითხებსა და პრობლემებს, ისე პოლიტიკის დოკუმენტებსა და სამართლებრივ-საკანონმდებლო საკითხებს.

ცენტრს სხვადასხა დროს სტუმრობდნენ და დისკუსიებში იღებდნენ მონაწილეობას სხვადასხვა ქვეყნების დიპლომატიური მისიის ხელმძღვანელები, მათ შორის ამერიკის შეერთებული შტატებისა და დიდი ბრიტანეთის ელჩები,  ასევე ქართველი პოლიტიკოსები, მათ შორის საქართველოს პრეზიდენტი, სხვადასხვა პოლიტიკური პარტიების ლიდერები.

ცენტრის ბაზაზე შექმნილია „ქუთაისის დემოკრატიული ჩართულობის ცენტრთან არსებული ქალთა კლუბი“, რომელიც აქტიურად მონაწილეობს შეხვედრებში, იკვლევს ქალთა პრობლემებს რეგიონში და ცდილობს მოიძიოს პრობლემათა გადაჭრის გზები.

2012 წლიდან საარჩევნო პერიოდში ქუთაისის ოფისში  ფუნქციონირებს საარჩევნო მედიაცენტრი, რომელიც მასპინძლობს იმ ღონისძიებებს, რომელთა მიზანი კანდიდატების საარჩევნო პროგრამების, ამომრჩეველთა სიების ფორმირების, ხმის მიცემის პროცედურების და არჩევნებთან დაკავშირებული სხვა მნიშვნელოვანი საკითხების შესახებ ამომრჩეველთა ინფორმირებაა. ცენტრი უზრუნველყოფს უსაფრთხო და ნეიტრალურ ადგილს დებატებისთვის და ბრიფინგებისთვის. საარჩევნო მედიაცენტრის ფუნქციონირების მანძილზე სულ ჩატარდა 195 შეხვედრა, აქედან ცენტრის მიერ ორგანიზებული იყო - 58.

ქუთაისის ცენტრის მიერ განხორციელებულ პროექტებს შორისაა, UNESCO-ს „კულტურული თვითგამოხატვის მრავალფეროვნების დაცვისა და ხელშეწყობის შესახებ“ 11 თვიანი პროექტი.